Concello de Ames

Somos ames

Nesta xornada aprenderase a podar cerdeiras e outro tipo de árbores froiteiras

Apúntate no curso de poda de árbores froiteiras

[08/02/2010] Todas as persoas que dispoñen dunha horta con árbores froiteiras xa saben o importante que é podalas para que medren sans, fortes e dean uns froitos de calidade. Por iso dende o Proxecto Amorodo/Asociación Lentura vaise organizar unha xornada de poda para coñecer os segredos desta técnica. O obradoiro realizarase o próximo día 20 de febreiro e estará dividido en tres partes. A primeira será unha charla teórica, a segunda abordará a práctica na aula e a última, e a máis instrutiva, consistirá en coñecer a técnica da poda realizando prácticas nunha horta.

O Concello repartirá 80.000 euros entre as familias numerosas de Ames

Apróbanse as bases da convocatoria de axudas para familias numerosas

[08/02/2010] O Concello de Ames acaba de aprobar as bases polas que se vai rexer a convocatoria de subvencións para as familias numerosas de Ames. A finalidade deste programa é o de proporcionar apoio económico a todas aquelas familias que son cualificadas como numerosas pola Consellería de Traballo e do Benestar da Xunta de Galicia ou organismos análogos doutras Comunicades Autónomas. O importe do que se dispón no Concello de Ames para destinar a esta convocatoria ascende a un total de 80.000 euros.

A EMMA volve a ofertar prazas para todas as súas especialidades musicais

A EMMA abre un novo prazo de matrícula para este curso 2009/2010

[08/02/2010] Dende o día 8 de febreiro a Escola Municipal de Música de Ames, que depende da Concellaría de Cultura, abre o prazo de matrícula para cubrir novas prazas durante este curso. As clases comezarán o día 1 de marzo e os interesados poderán inscribirse tanto en leccións de Movemento, para nenos e nenas entre 4 e 6 anos, como de Instrumento, para os nenos e nenas de 7 anos en diante. O prazo para matricularse estará aberto ata o día 19 de febreiro.

A resposta cidadá ante o desastre natural en Haití está a ser excepcional

Os centros educativos de Ames poñen en marcha campañas de axuda a Haití

[08/02/2010] A ANPA da Escola de Educación Infantil Milladoiro recollerá fondos mañá martes para colaborar na recuperación do país caribeño golpeado por varios terremotos o pasado mes de xaneiro. Esta campaña de doazóns complementará a que leva a cabo a Biblioteca Municipal de Ames co lema Con Haití no corazón. O CEIP de Ventín tamén aproveitará para axudar coa súa recadación que se sumará ás múltiples iniciativas espontáneas orixinadas no Concello.