Haberá contacontos, obradoiros e excursións deseñados en función das idades
As bibliotecas municipais e a Aula da Natureza organizan novas actividades relacionadas co mar
[23/09/2009] En outubro comezan novas actividades de animación á lectura organizadas polas bibliotecas municipais de Ames. Para este próximo trimestre, toda a programación xirará en torno ao mundo do mar. Xunto ás sesións de contacontos dirixidas aos nenos e nenas maiores de 3 anos, haberá tamén obradoiros e excursións dirixidos a rapaces e rapazas de 3º, 4º, 5º e 6º de primaria e de 1º e 2º da ESO e que estarán organizados conxuntamente coa Aula da Natureza. Todo encamiñado sempre a mostrar os libros como fonte de diversión e coñecemento.
Contacontos
As xa habituais sesións de contacontos volven un ano máis para entreter aos máis cativos da casa ao mesmo tempo que estes se familiarizan cos libros. Os nenos e nenas maiores de 3 anos poderán gozar escoitando narracións sobre o fermoso mundo do mar que correrán a cargo das animadoras á lectura das bibliotecas e da súa mascota Lepi. Os contacontos comezarán o mércores 7 de outubro na biblioteca do Milladoiro e durante os tres meses desenvolveranse ademais nas localidades amienses de Bertamiráns, Aldea Nova, Bugallido e Augapesada. Todas as sesións programadas serán ás 18:00 horas.
Obradoiros
Outras das actividades organizadas polas bibliotecas municipais en colaboración coa Aula da Natureza para os tres próximos meses son os obradoiros. Haberá un dedicado á praia, que está dirixido a rapaces e rapazas de 3º, 4º e 5º de primaria. Esta actividade terá lugar o sábado 31 de outubro ás 11:30 horas na biblioteca do Milladoiro. Para poder participar neste obradoiro todos os rapaces interesados deberán inscribirse nas bibliotecas municipais ou na Concellaría de Medio Ambiente entre o 5 e o 23 de outubro.
O segundo obradoiro, denominado Candeas Mariñas, está destinado a mozos e mozas de 6º de primaria e de 1º e 2º da ESO. Esta actividade desenvolverase o sábado 7 de novembro na biblioteca de Bertamiráns ás 11:30 horas. Todos os rapaces interesados neste obradoiro deberán inscribirse nas bibliotecas ou na Concellaría de Medio Ambiente entre o 19 de outubro e o 2 de novembro.
Excursións
Ademais dos obradoiros para os rapaces e rapaces de entre 3º de primaria e 2º da ESO as bibliotecas municipais e a Aula da Natureza tamén organizan dúas excursións relacionadas coa temática do mar. A actividade Enrólate: actividade de educación ambiental mariña levará aos rapaces de 3º, 4º e 5º de primaria ata o castelo de Santa Cruz de Oleiros o sábado 21 de novembro. Para poder participar os interesados deberán inscribirse nas bibliotecas ou na Concellaría de Medio Ambiente entre o 31 de outubro e o 3 de novembro.
Para os máis maiores tamén hai programada unha excursión. Neste caso visitarán, o 28 de novembro, o Acuario do Grove onde coñecerán numerosas especies mariñas. Para esta actividade tamén será preciso inscribirse nas bibliotecas ou na Concellaría de Medio Ambiente entre o 7 e o 23 de novembro. O custo para as dúas visitas será de 3 euros por persoa e, no caso de non chegar as prazas, terán prioridade os rapaces que asistiron aos obradoiros.
A nova noutros medios dixitais:
Somos Ames
- Apúntate no curso de poda de árbores froiteiras
- Apróbanse as bases da convocatoria de axudas para familias numerosas
- A EMMA abre un novo prazo de matrícula para este curso 2009/2010
- Os centros educativos de Ames poñen en marcha campañas de axuda a Haití
- O Concello demostra que o servizo de transporte público pode chegar ata Tarrío
Axenda
| « 2010 » | ||||||
| « febreiro » | ||||||
| L | M | M | X | V | S | D |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |