Concello de Ames

[http://www.concellodeames.org]

A Policía Local de Ames recupera as xoias procedentes dun furto rexistrado no lugar de Portanxil

[04-03-2013] A Policía Local de Ames localizou a pasada semana en Bertamiráns un conxunto de xoias de ouro que parecían proceder dun furto. Tras a localización, os axentes abriron as correspondentes dilixencias en colaboración coa Garda Civil do Milladoiro. Froito destas investigacións descubriuse que as xoias (entre as que había pendentes, pulseiras, ou colares) procedían dun roubo rexistrado este mesmo mes no lugar de Portanxil, na parroquia amiense de Trasmonte.

Tras o correspondente recoñecemento das xoias por parte dos seus propietarios, os axentes procederon a súa devolución. A Policía Local e a Garda Civil abriron as correspondentes investigacións para tratar de esclarecer o furto e localizar ao autor ou autores.

Ademais destas actuacións, a Policía Local de Ames participou no último mes en varias campañas postas en marcha pola Dirección Xeral de Tráfico. Deste xeito, entre o 25 de febreiro e o domingo 3 de marzo, os axentes participaron na campaña de control do transporte escolar. No marco deste programa, no que se controlaba o uso dos cintos de seguridade, o servizo de acompañamento ou o seguro do vehículo, os axentes controlaron un total de 20 autobuses que se encargan do transporte escolar nos colexios de Ames.

A principios deste mesmo mes, os membros da Policía Local de Ames tamén colaboraron na campaña de Tráfico para a vixilancia e control de camións e furgonetas. Deste xeito, entre o 11 e o 17 de febreiro, os axentes realizaron un total de 42 actuacións, por cuestións relativas aos vehículos, por deficiencias técnicas dos mesmos ou inmobilizacións.

Ligazóns

Máis do concello

Aviso legal | Accesibilidade | RSS