Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas O Concello de Ames...


O Concello de Ames dota ao mercado de rúa de Bertamiráns dun sistema de iluminación pioneiro para os postos dos vendedores ambulantes

[06-03-2013] O Concello de Ames está probando un sistema de iluminación no mercado de rúa de Bertamiráns. O concelleiro de Comercio e Promoción Económica, Bernardo Moar, estivo o pasado sábado 2 de marzo comprobando de primeira man o funcionamento deste sistema que ata o de agora instalouse en tres postos dos vendedores ambulantes. Con esta actuación permítese optimizar o período establecido para a actividade comercial os días de mercado de rúa, alongando ata as 20:30 horas o tempo de venda efectiva. Trátase dun sistema de iluminación pioneiro en Galicia e que esta sendo obxecto de interese por outros concellos con mercados de tarde/noite.

O mercado de rúa de Bertamiráns celébrase todos os sábados nas rúas da contorna da praza do Concello. En concreto na rúa Ameneiral e na rúa Entrerríos. Este mercado, está composto por un total de 65 postos e complétase con 45 comercios que están situados na súa área de influencia. Neste mercado véndense diversos produtos que van dende o téxtil, calzado e complementos ata alimentación e produtos do agro. Este mercado de rúa favorece a confluencia de clientes en todos os establecementos comerciais de Bertamiráns, polo que favorece a actividade comercial desta localidade.

A celebración do mercado de rúa os sábados pola tarde, sobre todo na época de outono e inverno, provoca unha redución das horas nas que é posible exercer a venda e polo tanto a atracción de cidadáns á zona comercial, xa que as horas de luz natural, redúcense como moito a dúas, de 16:00 as 18:00 horas, xa que a partir dese momento, a iluminación da rúa, pensada para un uso habitual de calquera rúa non permite que nin os cidadáns, nin os vendedores, teñan a posibilidade de exercer a súa actividade, de xeito eficiente, ao carecer de unha infraestrutura que permita facer unha iluminación autónoma do seu espazo de venda.

Tendo en conta isto, dende o Concello de Ames estase traballando para mellorar a súa aparencia e para asegurar unha imaxe máis homoxénea e atractiva para os consumidores amienses e aqueles que se achegan dende outros concellos da contorna. Nesta zona xa se realizaron varias actuacións para mellorar a pavimentación da rúa, a instalación de mobiliario urbano, etc. Unha das principais actuacións que se realizou nas rúas Ameneiral e Entrerrios foi a instalación de 11 arquetas, que contan con capacidade de 6 tomas de 24V DC cada unha e con unha estrutura móbil escamoteable.

Este sistema permítelle á maioría dos postos existentes no mercado acceder de xeito independente a unha rede de baixa tensión, que sendo suficiente para iluminar cada espazo, combina a utilización de lámpadas LED (de baixo consumo e de grande eficiencia e aforro enerxético). A final de ano agárdase completar esta actuación coa instalación de 3 arquetas máis para que todos os postos teñan acceso ao subministro eléctrico. Criterios de eficiencia enerxética
Na instalación deste sistema de alumeado tivéronse en conta varios criterios de eficiencia enerxética como o nivel axeitado para a actividade que se realiza (venda ambulante); o cumprimento da normativa de seguridade (validados por Industria para a iluminación no exterior); e a utilización de lámpadas con gran eficacia luminosa xa que contan cun elevado fluxo luminoso e un baixo consumo enerxético.

Neste senso o gran desenvolvemento experimentado pola tecnoloxía LED, como fonte de luz para a súa utilización no alumeado publico, motiva a aparición no mercado de produtos que implantan esta tecnoloxía para substituír a iluminación convencional. Estes novos sistemas teñen grandes beneficios de eficiencia enerxética, de redución de custos e de durabilidade.

Con esta actuación conséguese un gran aforro. Unha mostra disto é que o custo mensual que ocasiona a utilización deste sistema de iluminación por parte dos 65 postos de venta ambulante é de tan só 20.73 euros, IVE incluído.

Ligazóns

  • El Correo Gallego: "Ames dota ao mercado de rúa de Bertamiráns dun sistema de iluminación pioneiro"
  • La Voz de Galicia: "El mercado de Bertamiráns tendrá una iluminación pionera"

Máis do concello


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925